ПОЛАЦКАЯ МАРКА
Сяргей Шыдлоўскі
У індустрыі моды больш паловы кошту прадукцыі прыходзіцца на гандлёвую марку. Пакупнік плаціць за імя на бірцы. У мастацтве гэтая лічба, магчыма, яшчэ большая. Колькі прыходзіцца на кошт фарбы ў агульнай цане карцін Ван Гога? Калекцыянэры набываць ня проста халсціну, а прэстыж. Мастак - прадавец паветра, каштоўнасць якога вызначаецца тым, наколькі выразна перададзены водар часу і месца.
На міф баварскага піва працуе кожны нямецкі шынок. У славе віцебскай мастацкай школы ўшаноўваецца супольны плён усёй местачковай культуры беларускага габрэйства. Іншымі словамі, індывідуальны талент- гэта вытворнае ад агульнага ўзроўню культуры асяроддзя, яго сфармаваўшага. Творчая рэалізацыя адпаведна залежыць ад таго, наколькі поўна патрапіць мастак сінтэзаваць традыцыю гэтай зямлі. Сусьветнае мастацтва - творчасьць «абарыгенаў» і «акцэнту». Сусветныя сталіцы - не столькі творчыя асяродкі, колькі біржы, на якіх вызначаюць арт-катыроўкі.
Бліскучая будучыня патрабуе велічнага мінулага, міфу пра «залатое стагоддзе». Самабытнасць крывіцкай сталіцы - сталіцы святароў, ваяроў, купцоў і студэнтаў - рэсурс, які яшчэ як след не актуалізаваны, але нават латэнтнае існаванне гэтага ідэалагічнага комплексу не можа не ўплываць на справы і амбіцыі сучасных палачанаў.
Патрэбна наяўнасць годных спадкаемцаў, што ўсведамляюць сумер дастаўшагася ім багацця. Полацк - горад жывых, і ўсе яго нэкропалі, руіны, лабірынты-клады набудуць сапраўдную вартасць, закладзеную працай і навагамі продкаў, толькі матэрыялізаваўшыся ў сучасных праектах.
Клапаціцца пра славу свайго Імя, пра непарыўнасць традыцый Роду, прэстыж уласнага Дому - найлепшае капіталаўкладанне. Тысячагадовы Полацак быў сведкам і перажыў усе палітычныя і дзяржаўныя фармацыі, што змяняліся стагоддзямі на старажытнай крывіцкай зямлі. Рагнеду, Усяслава, Эўфрасінню, Францыска, Сімяона аспрэчвалі адзін у аднога палякі, ліцьвіны, расейцы... Хто яшчэ? Між тым праўда навідавоку - яны Палачане.
Похожие страницы :
| Сяргей Шыдлоўскi. МУЗЭЮМ |
| Сяргей Шыдлоўскі. БОЛЬШ ЧЫМ ГОРАД |
| Сяргей Шыдлоўскi. Каардынаты Полацкага |
| Сяргей Шыдлоўскі. ЗЬБІРАНЬНЕ ПОЛАЦКУ |